दुर्घटनाग्रस्त अवस्थामा भेटियो तारा एयरको विमान , कोही पनि यात्रु जिवित भेटिएनन्
काठमाडौँ । तारा एयरको जहाज दुर्घटनाग्रस्त अवस्थामा फेला परेको छ।
आइतबार बिहानदेखि बेपत्ता भएको जहाज मुस्ताङको थसाङ गाउँपालिका-२ सानोस्वरेमा दुर्घटनाग्रस्त अवस्थामा फेला परेको नेपाली सेनाले जनाएको हो।
आज बिहानैदेखि खोजीकार्यमा हिँडेको नेपाली सेनाको टोलीले जहाज भेटाएको हो।
नेपाली सेना र नेपाल प्रहरीको टोली तारा एयरको विमान दुर्घटनास्थल पुगेको छ । आइतबार सम्पर्कविहीन भएको विमान सोमबार बिहान मुस्ताङको थासाङ गाउँपालिका(२ मा भेटिएको थियो। स्थानीयले खबर गरेपछि नेपाली सेना र प्रहरीको टोली घटनास्थल पुगेको छ ।
जहाज पुरै टुक्राटुक्रा अवस्थामा छ भने कोही पनि यात्रु ज्युँदो नरहेको त्यहाँ पुगेका उद्धारकर्मीले बताएका छन् । सबैले शव संकलन गरिरहेको नेपाली सेनाको विजयपुर ब्यारेकका प्रमुख सेनानी प्रेम पौडेलले जानकारी दिए । दुर्घटनामा परी मृत्यु भएकाहरूको शव सिधै काठमाडौं ल्याइने छ ।
हुस्सु र कुहिरोका कारण अझै हेलिकोप्टर राम्रोसँग उड्ने अवस्था नरहेको उनले बताए । सेनाका १ जना र प्रहरीका १ जनालाई हेलिकोप्टर मार्फत झारिएको हो । चालक दलका तीन सहित २२ जना सवार जहाज आज बिहान मुस्ताङको थासाङ गाउँपालिका – २ को सानोसरे भन्ने ठाउँमा दुर्घटनाग्रस्त अवस्थामा भेटिएको थियो ।
