हेटौंडा गोल्डकपको आज फाईनल – हेटौंडा र भरतपुर भिड्दै
माघ २३, हेटौंडा । हेटौंडा,१० को फरेष्ट्री क्याम्पसको खेल मैदानमा जारी ‘विजय युथ हेटौंडा गोल्डकप’ फुटबल प्रतियोगितामा आज उपाधीका लागि आयोजक टिम एफसी विजय युथ क्लब,हेटौंडा र सेन्ट्रल कलेज विएसी,भरतपुर भिड्ने भएका छन् ।
बुधबार भएको दोस्रो सेमिफाईनल खेलमा आयोजक टिम विजय युथ क्लबले बागमती युवा क्लब, सर्लाहीलाई ५–१ गोल अन्तरले पराजित गर्दै फाईनलमा प्रवेश गरेको थियो । आज दिउँसो २ बजे हुने फाईनल खेलमा उपाधीका लागि एफसी विजय युथ क्लब,हेटौंडा र सेन्ट्रल कलेज विएसी,भरतपुर खेल्ने छन् । यसअघि मंगलबार भएको पहिलो सेमिफाईनल खेलमा हर्दि युवा समाज,राप्तीलाई १–० गोल अन्तर पराजित गर्दै सेन्ट्रल कलेज फाईनलमा प्रवेश गरेको थियो ।
प्रतियोगितामा विजेताले नगद ३ लाख र उपविजेताले १ लाख ५० हजार रुपैयाँ प्राप्त गर्ने छन् भने विधागतरुपमा उत्कृष्ट हुने गोलरक्षक, डिफेन्डर, मिडफिल्डर, फरवार्ड तथा प्रशिक्षकले जनही नगद पाँच–पाँच हजार रुपैयाँ प्राप्त गर्ने छन् ।
