पेट्रोलियम पदार्थको मूल्य फेरि बढ्यो
काठमाडौं, फागुन १८ – नेपाल आयल निगमले पेट्रोलियम पदार्थको मूल्य एकै सातमै दुई पटक बढाएको छ। निगमले सोमबार राति १२ बजेबाट लागू हुने गरी डिजेल, पेट्रोल र मट्टीतेल र हवाई इन्धनको मूल्य बढाएको हो।
निगमले गत फागुन ४ गते मात्र पेट्रोलियम पदार्थको मूल्य बढाएको थियो । निगमले डिजेल, पेट्रोल र मटितेलमा प्रतिलिटर २ रुपैयाँ र हवाई इन्धन आन्तरिकतर्फ प्रतिलिटरमा ५ रुपैयाँले मूल्य बढाएको छ। यस्तै हवाई इन्धन बाहृयतर्फको मूल्य पनि एक किलोलिटरमा २५ अमेरिकी डलरले वृद्धि गरिएको छ।
अब पेट्रोल प्रतिलिटर एक सय १६ रुपैयाँ र डिजेल तथा मटितेल ९९ रुपैयाँ पर्ने छ भने हवाई इन्धन आन्तरिकतर्फको प्रतिलिटर मूल्य ७२ रुपैयाँ र आन्तर्राष्ट्रिय उडानतर्फको प्रति किलोलिटर मूल्य ८९३ अमेरिकी डलर पर्ने छ। अन्तर्राष्ट्रिय बजार कच्चा तेलको मूल्यमा भएको बृद्धिका कारण भारतीय आयल कर्पोरेसनबाट बढेर मूल्य प्राप्त भएको निगमले जनाएको छ ।
समायोजन पछि पनि निगमलाई पेट्रोलमा प्रतिलिटर ८.४२ रुपैयाँ, डिजेलमा प्रतिलिटर ६.५६ तथा एलपी ग्याँसमा प्रति सिलिन्डर ३९२.८२ रुपैयाँ घाटा रहेको निगमले जनाएको छ।
