आज हेटौंडामा बागमती र क्यामरुन भिड्दै
चैत २, हेटौंडा । हेटौंडामा जारी स्थानीय तह शहीद स्मृति गोल्डकप प्रतियोगितामा आज सेमिफाईनल प्रवेशका लागि सर्लाहीकोे बागमती र विदेशी क्लब अफ्रिकन रुट्स एशोसिएसन(अरास) डुवल क्यामरुन भिड्दै छन् ।
आज विजयी हुने टिमले सेमिफाईनलमा चैत ५ गते बिहिबार नेपाल आर्मी क्लब संग भिड्न पाउने छ । यसअघि चैत १ गते आईतबार हेटौंडाको वनविज्ञान अध्ययन संस्थानको खेलमैदानमा भएको खेलमा २–१ गोलले एपिएफलाई हराउँदै बागमती प्रतियोगिताको क्वार्टरफाइनल प्रवेश गरेको थियो भने फागुन २८ गते शनिबार भएको खेलमा आर्मीले जावलाखेल युथ क्लबलाई हराउँदै प्रतियोगिताको सेमिफाइनलमा प्रवेश गरेको थियो ।
यसैगरि सोमबार भएको खेलमा एडिभिजन लिग विजेता मछिन्द्र क्लबले संकटा क्लबलाई १ ० गोल अन्तरले पराजित गरेको छ । खेलको २४ औ मिनेटमा राजेश परियारले गरेको गोलसंगै मछिन्द्र विजयी भएको हो । यो जितथ संगै मछिन्द्रले चैत ४ गते (भोलि)हुने पहिलो सेमिफाइनल खेलमा आयोजक टिम मकवानपुर-११ संग भिड्ने छ ।
जिल्ला फुटबल संघ मकवानपुरको आयोजना भएको प्रतियोगिताको बिजेता टोलीले ट्रफिसहित नगद १० लाख प्राप्त गर्नेछ भने उपविजेता हुने टोलीले ट्रफिसहित नगद ५ लाख प्राप्त गर्नेछ । प्रतियोगिताको सर्बोउत्कृट खेलाडीले रोयल इन्फिल्ड बुलेट बाईक हात पार्नेछन् ।
त्यस्तै विधागत उत्कृट हुने खेलाडी ट्रफिसहित नगद २५–२५ हजार प्राप्त गर्नेछन् । फागुन २७ गते देखी शुरु भएको प्रतियोगिताको फाइनल खेल चैत ७ गते हुने आयोजकले जनाएको छ ।
