मेस्सी र नेइमारविनै पीएसजीले सानदार जित निकाल्यो
एजेन्सी । फ्रेन्च लिग वानमा पेरिस सेन्ट जर्मेन (पीएसजी) ले सानदार जित निकालेको छ । गएराति भएको खेलमा पीएसजीले क्लेरमोन्ट फुटलाई ४–० गोल अन्तरले पराजित गरेको हो ।
लियोनल मेस्सी र नेइमार विनाको खेलमा पीएसजीलाई सानदार जित दिलाउनको लागि एन्डर हेरेराले दुई गोल गरे भने केलियन एमबाप्पे र इड्रिसा गाना गुआईले समान एक–एक गोल थपे ।
खेलको २०औं मिनेटमा एन्डर हेरेराले गोल गर्दै पीएसजीलाई अग्रता दिलाएका थिए । ३१ औं मिनेटमा एन्डर हेरेराले व्यक्तिगत दोस्रो गोल गर्दै पीएसजीलाई पहिलो हाफमा २–० को अग्रता दिलाए ।
५५औं मिनेटमा केलियन एमबाप्पेले गोल गर्दै पीएसजीलाई ३–० ले अघि बढाए । ६५औं मिनेटमा इड्रिसा गाना गुआईले गोल गर्दै पीएसजीलाई ४–० को फराकिलो जित दिलाए ।
लगातार पाँचौ जितसँगै पीएसजी १५ अंक जोडेर शीर्षस्थानमा यथावत रहेको छ । पीएसजीले दोस्रो स्थानमा रहेको एन्जर्स र मार्सेलाई ५ अंकले पछि पारेको छ । पहिलो हार बेहोरेको क्लेरमोन्ट ८ अंकसहित चौथो स्थानमा रहेको छ ।
