सन्दीप लामिछाने आबद्ध होबार्ट हरिकेन्सले आज पहिलो खेल खेल्दै
काठमाडौं । बिग बास लिग (बीबीएल) ट्वान्टी–२० क्रिकेटमा नेपाली लेग स्पिनर सन्दीप लामिछाने आबद्ध होबार्ट हरिकेन्सले आज पहिलो खेल खेल्दै छ ।
करिब एक वर्षपछि फ्रेन्चाइज लिग खेल्न लागेका सन्दीप पहिलो खेलमा नै टिमका लागि सकारात्मक प्रभाव देखाउने योजनामा छन् । सन्दीपले गत सिजन होबार्टका लागि आठ खेल खेल्दै आठ विकेट लिएका थिए ।
होबार्टले सिड्नी सिक्सर्ससँग अरोरा स्टेडियममा नेपाली समयानुसार दिउँसो १ः२० मा प्रतिस्पर्धा गर्नेछ ।
होबार्ट पहिलो खेलमा सहज जित निकाल्ने योजनामा छ । प्रतियोगिताको दोस्रो खेल खेल्न लागेको सिड्नी भने लगातार दोस्रो जित निकाल्ने योजनामा छ ।सन्दीपले लगातार दोस्रो सिजन होबार्टबाट खेल्न लागेका हुन् । त्यसअघि, सन्दीपले मेलबर्न स्टार्सबाट बिग बास लिग खेलेका थिए । सन्दीप बिग बास लिग खेल्ने पहिलो नेपाली खेलाडी हुन् ।
