किसानले बेच्ने दूधको मूल्य बढ्यो, मकवानपुरका किसान खुसी

हेटौंडा । किसानले बेच्ने दूधको मूल्य प्रतिलिटर साढे ६ रुपैयाँ बढेको छ । किसानले प्राप्त गर्ने मुल्य बृद्धी भएपछी मकवानपुरका किसान खुसी भएका छन् । दूधको मुल्य बृद्धी नहुँदा निकै समस्यामा पर्दै आएका मकवानपुरका किसान अहिले भने खुसी भएका छन् ।

पहिले गाइ, भैसीलाई खुवाउने दाना, ढुटो, चोकरको मुल्य आकासीए पनि दूधको मूल्य बृद्धी नहुँदा किसान समस्यामा पर्दै आएपनि अहिले भने राहत मिलेको किसानहरु बताउँछन् । हिजो बसेको मन्त्रिपरिषद्को बैठकले किसानका लागि दूधको समर्थन मूल्यमा ६ रुपैयाँ ५२ पैसा बढाउँदै प्रतिलिटर ५६ रुपैयाँ ४ पैसा कायम गरेको छ ।

यसअघि कच्चा दूधको मूल्य प्रतिलिटर ४९ रुपैयाँ ५२ पैसा रहेकोमा लिटरमा १३ दशमलव १७ प्रतिशत अर्थात ६ रुपैयाँ ५२ पैसाले वृद्धि भएको एक मन्त्रीले जानकारी दिएका छन् । सरकारले तोकेको मूल्य किसानको लागि हो, उपभोक्ताका लागि प्रशोधित दूधको मूल्य भने दूग्ध विकास संस्थानले तय गर्नेछ ।

किसानले दूध उत्पादनमा लागत बढेको भन्दै मूल्य बढाउन माग गर्दै आए पनि सरकारले साढे २ वर्षपछि हिजो मूल्य बढाएको हो । दूधको लागत मूल्यसमेत नउठेको भन्दै केन्द्रीय दूग्ध सहकारी सङ्घ लिमिटेडले मूल्यवृद्धिका लागि कृषि तथा पशुपक्षी विकास मन्त्रालयलाई अनुरोध गरेपछि अध्ययनका लागि समिति गठन गरेको थियो ।

समितिले दिएको प्रतिवेदनका आधारमा मूल्य बढाउने प्रस्ताव कृषि मन्त्रालयले मन्त्रिपरिषदमा लगेको थियो । विगतमा हरेक वर्ष मूल्य समायोजन हुँदै आए पनि पछिल्लो समय साढे दुई वर्षयता दूधको मूल्य समायोजन भएको थिएन ।