जिएस निकेतनलाई हराउँदै भुटनदेवी मावि फाइनल प्रवेश

हेटौंडा । निरज श्रेष्ठको स्मृतिमा जारी जिल्लास्तरिय अन्तर विद्यालय टि–२० क्रिकेट प्रतियोगिता अन्तर्गत भुटनदेवी मावि फाइनल प्रवेश गरेको छ । बुधबार हेटौंडा–४ स्थित हुप्रचौरमा भएको पहिलो सेमिफाइनल खेलमा जिएस निकेतनलाई ७१ रनले हराउँदै भुटनदेवी फाइनलमा प्रवेश गरेको हो ।

टस जितेर ब्याटिङ गरेको भुटनदेवीले २० ओभरमा ९ विकेट गुमाउँदै १ सय ७७ रन बनाएको थियो । भुटनदेवीका लागि बिटु पलले ५१ रन र ओम प्रकाशरामले ३० रन बनाए । जवाफी लक्ष्य पछ्याएको जिएस निकेतनले १८ ओभर ५ बलमा अल आउट हुँदै जम्मा १ सय ६ रन बनाएको थियो । खेलको म्यान अफ द म्याच भुटनदेवीका बिटु पल घोषित भए ।

यस्तै, बुधबार नै फाइनल प्रवेशका लागि दोस्रो सेमिफाइनल खेलमा आधुनिक राष्ट्रिय मावि र सोलिड्यारिटी भिड्नेछन् । खेल दिउँसो २ बजे हुनेछ । प्रतियोगिताको फाइनल खेल बिहिबार बिहान ११ बजे हुने जनाइएको छ । प्रतियोगिताको विजेताले नगद ३० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले नगद २० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् ।