मैत्रीपूर्ण एकदिवसीय खेलमा मकवानपुर विजयी
हेटौंडा । मकवानपुर जिल्ला क्रिकेट टिम र काठमाडौं क्रिकेट टिमबीच भएको मैत्रीपूर्ण एकदिवसीय खेलमा मकवानपुर क्रिकेट टिमले विजयी सुरुवात गरेको छ । शनिबार मकवानपुर क्रिकेट संघको आयोजनामा हेटौंडा–४, हुप्रचौरमा भएको खेलमा मकवानपुरले काठमाडौंलाई ३३ रनले हराएको हो ।
टस जितेर पहिले व्याटिङ गरेको मकवानपुरले निर्धारित ३६।१ ओभरमा अलआउट हुँदै १ सय ८४ रन बनायो । मकवानपुरलाई जित दिलाउन विशाल फुँयालले २७ रन, तक्षक सिम्खडाले २६, साहिल कंशाकारले २२ रन र राम नरेश गिरीले २० रन बनाए । बलिङतर्फ रिजन ढकालले ४ विकेट, साहिल कंशाकारले ३ विकेट लिएका थिए । मकवानपुरको कप्तानी सुमन सुनुवारले गरेका थिए ।
जवाफी व्याटिङ गरेको काठमाडौंले ३५।३ ओभरमा अलआउट हुँदै जम्मा १ सय ५१ रन बनायो । काठमाडौंका लागि सचिन लेखकले ५० रन बनाए । अरु ब्याट्सम्यान भने खासै चल्न सकेनन् । काठमाडौंको कप्तानी सचिन लेखकले गरेका थिए । यस्तै आइतबार पनि मकवानपुर र काठमाडौंबीच एकदिवसीय खेल हुनेछ भने सोमबार टि–२० खेल हुनेछ । तीन खेलमा २ खेल जित्ने टिमले शिल्ड प्राप्त गर्नेछ ।
