हात्तिको आक्रमणबाट बकैयामा एक वृद्धको मृत्यु

हेटौंडा । हात्तिको आक्रमणबाट मकवानपुरको बकैयामा एक जना वृद्धको मृत्यु भएको छ । मकवानपुरमा स्थानीयहरु  जंगली हात्ती आतंकले उग्र रुप लिदै जाँदा त्रसित भएका छन् ।

हात्तीको आक्रमणबाट बकैया गाउँपालिका वडा नम्बर–५ पावस निवासी ५० वर्षका जनकलाल माझीको  मृत्यु भएको जिल्ला प्रहरी कार्यालय मकवानपुरले जनाएको छ । प्रहरीका अनुसार गएराति बाख्रा ब्याएपछि गोठमा जाने क्रममा बाटोमै हात्तीले आक्रमण गरेको थियो ।

आक्रमणमा परेर बेहोस भएका माझिको उपचारको गर्न हेटौँडा ल्याईएकोमा ज्यान गएको जिल्ला प्रहरी कार्यालय मकवानपुरले जनाएको छ । यस अघि सोही हात्तीले मनहरीमा एक महिलाको ज्यान लिएको थियो भने हेटौंडा–१८ मा एक पुरुषलाई घाइते बनाएको थियो।

सोमबारदेखि मकवानपुर जिल्लाको गाउँबस्ति चार्दै, मान्छे मास्दै गर्दा सम्बन्धित निकायले जनताको जिउधन सुरक्षामा ध्यान नदिएको स्थानीयहरु आक्रोसित भएका छन् । मानवबस्तीमा हात्ती प्रवेश गरेर दिनदिनै मान्छेमाथि आक्रमण गरी ज्यान लिदा पनि प्रशासन कानमा तेल हालेर बसेको स्थानीयहरुको आरोप छ ।