हेटौंडा–काठमाण्डौं जोड्ने छोटा दुरीको सडक अवरुद्ध
हेटौंडा । अविरल वर्षाका कारण हेटौंडा–काठमाण्डौं जोड्ने दुइ वटा छोटा दुरीका सडक अवरुद्ध भएका छन् । कान्तिलोकपथ सडक अन्तरगत मकवानपुरको भीमफेदि गाउँपालिका वडा नम्बर–८ कालोपहिरो, बकैया गाउँपालिका वडा नम्बर–१२ मानेघुम्ती, ठिंगनबजार, चौताराभिर, बकैया–११ आहालेगाँउ, खोरभन्ज्याङ स्थित कान्तीलोकपथ सडकखण्ड अवरुद्ध रहेको छ ।
यस सडकमा अविरल बर्षाको कारण सडकमा माथिबाट पहिरो आई बाटो पुर्णरुपमा अवरोध भएको, बाटो खुलाउनको लागी सडक विभाग सँग समन्वय भईरहेको जिल्ला प्रहरी कार्यालय मकवानपुरले जनाएको छ ।
यसैगरी हेटौंडा–भीमफेदी, कुलेखानी सडक खण्ड अन्तरगत भिमफेदि गाउँपालिका वडा नम्बर–४ रातोमाटे स्थित भैंसे भिमफेदि काठमाण्डौ सडक खण्डमा अविरल बर्षाको कारण माथिबाट पहिरो आई बाटो पुर्णरुपमा अवरोध भएको छ । बाटो खुलाउनको लागि सडक विभाग सँग समन्वय भईरहेको प्रहरीले जनाएको छ ।
