गठ्ठाघर दुर्घटनाको छानबिन गर्न समिति गठन
काठमाण्डौ – भक्तपुरको गठ्ठाघरमा अस्ति भएको दुर्घटनाको छानबिन गर्न जिल्ला प्रशासन कार्यालय भक्तपुरले समिति गठन गरेको छ । गठ्ठाघर चोकनजिकै ना ६ ख २१७३ नम्बरको ट्रकले बा ३९ प ८९४४ नम्बरको स्कुटरलाई ठक्कर दिँदा स्कुटर चालक ओखलढुङ्गा चिशङ्खुगढी गाउँपालिका‐४ खहरे स्थायी घर भई काठमाण्डौको कपन बस्दै आएका ६५ वर्षका उत्तम कोइरालाको ज्यान गएको थियो ।
सात दिनभित्र प्रतिवेदन पेस गर्नेगरी सहायक प्रमुख जिल्ला अधिकारी डोलेन्द्रप्रसाद निरौलाको संयोजकत्वमा पाँच सदस्यीय छानबिन समिति गठन गरिएको प्रमुख जिल्ला अधिकारी रोशनीकुमारी श्रेष्ठले जानकारी दिनुभयो ।
समितिको सदस्यमा जिल्ला प्रहरी परिसर भक्तपुरका प्रहरी नायब उपरीक्षक राजन कार्की, यातायात व्यवस्था विभाग सवारी चालक अनुमतिपत्र राधेराधे कार्यालयका उत्तम बस्नेत र नागरिक समाजका तर्फबाट मृतकका आफन्त तुलसी हरि कोइराला रहनुभएको छ ।
गठ्ठाघरमा भएको घटनाको छानबिन गर्न यसअघि उपत्यका प्रहरी कार्यालयका एसपी प्रदीप केसीको नेतृत्वमा छानबिन समिति बनाएर हिजोदेखि नै काम शुरु भइसकेको छ ।
