ओली–मोदी भेटवार्ता आज, समय २० मिनेट
जेठ १७ । प्रधानमन्त्री केपी शर्मा ओलीले आफ्ना भारतीय समकक्षी नरेन्द्र मोदीसँग आज शुक्रबार भेटवार्ता गर्दैछन् । नयाँ दिल्लीमा नेपाली समय अनुसार बिहान पौने १२ बजे भेटवार्ताका लागि समय तय भएको बताइएको छ ।
भेटवार्तामा द्विपक्षीय हितबारे महत्वपूर्ण छलफल हुने प्रधानमन्त्रीको सचिवालयले जनाएको छ । भेटवार्ताका लागि २० मिनेटको समय तोकिएको छ ।
दोस्रो कार्यकालका लागि प्रधानमन्त्रीमा चुनिएका मोदीको शपथ समारोहमा सहभागी हुन ओली दिल्ली पुगेका थिए ।
शपथ समारोहपछि ओली भारतीय राष्ट्रपतिले सरकार प्रमुखहरुका लागि आयोजना गरेको रात्रि भोजमा सहभागी भएका थिए ।
भारतीय प्रधानमन्त्रीसँगको भेटवार्तापछि ओली शुक्रबार नै स्वदेश फर्कने कार्यतालिका छ ।
