लगातारको वर्षातले सिंहदरबारको पर्खाल भत्कियो, एक घाइते

काठमाडौं । लगातारको वर्षाले मुख्य प्रशासनिक निकाय सिंहदरबारको पर्खाल भत्किएको छ । तीनदिन देखिको वर्षाले सिंहदरबारको अनामनगर तर्फको पर्खाल ढलेको हो । पर्खाल ढल्दा एक जना घाइते बनेको महानगरीय प्रहरी वृत्त सिंहदरबारले जनाएको छ । घाइतेको अवस्था सामान्य रहेको छ । पर्खाल भत्किएपछि अनामनगर क्षेत्र तर्फको सडक एकतर्फि सञ्चालन भएको प्रहरीले जनाएको छ । भत्किएको पर्खाल पन्छाउने कार्य भइरहेको प्रहरीले जनाएको छ । यसअघि वर्षाका कारण आज विहान ललितपुरमा एक रुख ढल्दा महानगरीय प्रहरी प्रभाग पुल्चोकको कार्यालयमा क्षति पुगेको थियो । अविरल वर्षापछि देशभरको जनजीवन प्रभावित भएको छ । तराईका अधिकांश स्थान जलमग्न भएको छ । पहाडी क्षेत्रमा पहिरो गएको छ भने केही घरहरुमा समेत क्षति पुगेको छ ।