मकवानपुरमा बाढी पहिरोबाट मृत्यु हुनेको संख्या ५ पुग्यो

हेटौंडा । बिहिबार देखि भएको निरन्तर वर्षाको कारण बाढी पहिरोमा परि मकवानपुरमा मृत्यु हुनेको संख्या ५ पुगेको छ । मकवानपुरको ईन्द्रसरोबरमा आईतबार राति घरमा लडेको पहिरोमा परि स्थानिय आमाछोरी कान्छिमाया बलामी र उनकी छोरी १८ वर्षीया बविता बलामीको शव सोमबार फेला परे संगै मृत्यु हुनेको संख्या ५ पुगेको हो । यस अघि निरन्तर परेको वर्षाले शुक्रबार मकवानपुरको थाहा नगरपालि वडा नंबर ३ मा महाभिर खोलाले बगाउँदा वालिका सञ्चनम बलामीको मृत्यु भएको थियो । जिल्लाकै कैलाश गाउँपालिका वडा नंबर १० नामटारस्थित शुक्रबार डर खोलाले बगाउँदा सोही वडा बस्ने वर्ष ५५ को सानुकान्छा सुनारको मृत्यु भएको थियो । यस्तै शुक्रबार नै जिल्लाको ईन्द्रसरोवर गाउँपालिका वडा नंबर २ मा वर्ष १४ की श्रृष्टि डिम्डुङको पहिरोले पुरिएर मृत्यु भएको थियो ।