पत्रकार खेम भण्डारीलाई एक घण्टा कैद र एक रुपैयाँ जरिवाना
काठमाडौँ । कञ्चनपुर जिल्ला अदालतले पत्रकार खेम भण्डारीलाई एक घण्टा कैद र एक रुपैयाँ जरिवानाको सजाय सुनाएको छ। अदालतको अवहेलना सम्बन्धी मुद्दामा भण्डारीलाई सर्तसहितको कैद र जरिवानाको फैसला भएको जिल्ला अदालतका स्रेष्तेदार हरिकृष्ण अवस्थीले जानकारी दिए । भण्डारीविरुद्ध नेपाल वार एसोसिएसन कञ्चननपुरले अवहेलना मुद्दा दर्ता गरेको थियो। मुद्दामा जिल्ला न्यायाधीश डा। सुरेन्द्र प्रसाद आचार्यको इजलासले सर्तसहितको कैद र जरिवानाको सजाय सुनाएको हो । भण्डारीलाई एक घण्टा कैद र एक रुपैयाँ जरिवाना सुनाइए पनि उनले आफ्नो फेसबुक र पत्रिकामा अदालतविरुद्ध लेखेका सामग्री हटाएर आत्मालोचना गरेमा कैद र जरिवाना कार्यान्नयन नहुने आदेश भएको श्रेष्तेदार अवस्थीले बताए । यसका लागि भण्डारीलाई तीन दिनका समय दिइएको उनले बताए। तर अटेर गरेमा र तीन दिनभित्र सजाय भुक्तानका लागि उपस्थित नभएमा एक घण्टा कैदको सट्टा एक दिन र एक रुपैयाँ कैदको सट्टा एक दिन गरी दुई दिनको कैद सजाय हुने फैसलामा उल्लेख गरिएको श्रेष्तेदार अवस्थीले जानकारी दिए।
