जीप दुर्घटना हुदा दुईको मृत्यु, ११ घाइते
बाजुराको जगन्नाथ गाउँपालिका–५ स्थित जुवाखोलामा शुक्रबार बिहान यात्रुबाहक जीप दुर्घटनमा परेको छ । विहान साढे ८ बजे भएको सो घटनामा दुई जनाको मृत्यु भएको छ भने ११ जना घाइते भएका छन् । क १ ज २१ नम्बरको सो जीप बाजुराको फिलुचौरबाट कालीकोटको जितेगडा जाँदै थियो । दुर्घटनामा मृत्यु हुनेमा कैलालीको टीकापुर नगरपालिका–४ का जीप चालक २६ वर्षीय रमेश बोगटी र खत्याड गाउँपालिका–६, मुगुका २४ वर्षीय रामबहादुर शाही छन् । दुबैको घटनास्थलमै मृत्यु भएको हो । जिल्ला प्रहरी कार्यालय बाजुराका डीएसपी उद्धवसिंह भाटले जीपमा चालकसहित १५ जना सवार जीप रहेकोमा घाइते ११ मध्ये चार जनाको अवस्था गम्भीर रहेको बताए । कमजोर सडक संरचनाका कारण दुर्घटना भएको बताइएको छ ।
