नेपाली क्रिकेट टोली आज स्वदेश फर्किदै
काठमाडौं – आईसीसी टि–२० विश्वकप छनोट एसिया फाइनलमा तेस्रो स्थानमा चित्त बुझाएको नेपाली टोली आज (सोमबार) स्वदेश फर्किदैछ । आइतबार बिहान भएको छनोटको अन्तिम खेलमा नेपाल घरेलु टोली सिंगापुरसँग अप्रत्यासित रुपमा पराजित भएको थियो । उक्त खेलमा सिंगापुरले नेपालमाथि ८२ रनको जीत हात पारेको थियो । अस्ट्रेलियामा २०२० मा हुने खेलमा टि–२० विश्वकप पुग्ने सपना सहित सिंगापुर पुगेको नेपाली टोलीलाई घरेलु टोलीले स्तब्ध पार्दा नेपाल निराश हुँदै आज स्वदेश फर्किदैछ ।
नेपाली टोली आज राति साढे १० बजे त्रिभुवन अन्तर्राष्ट्रिय विमानस्थल ओर्लने टिम म्यानेजर रमन सिवाकोटीले जानकारी दिएका छन् । विश्वकप छनोटका ४ खेलमा २ खेलको अप्रत्यासित हारले नेपालको ग्लोबल छनोटसम्भावना टुङ्गीएको थियो । नेपाली टोलीको हारमा नेपालले मैदानमा रणनिती बनाउन नसकेको कतिपयको गुनासो छ ।
