चिनियाँ राष्ट्रपतिको नेपाल भ्रमण फलदायी भएको नेकपाको निष्कर्ष
हेटौंडा । नेपाल कम्युनिस्ट पार्टी (नेकपा) को विदेश विभागले चिनियाँ राष्ट्रपतिको नेपाल भ्रमण फलदायी भएको निष्कर्ष निकालेको छ ।
नेकपाको विदेश विभागको मंगलबार बसेको बैठकले चिनियाँ राष्ट्रपति सी चिनफिङको नेपाल भ्रमणका बारेमा समीक्षा गरेको हो ।
बैठकले भ्रमण फलदायी भएको र दीर्घकालीन महत्व र नेपालको विकासमा कोशेढुंगा हुने निष्कर्ष निकालिएको छ ।
विदेश विभागका प्रमुख माधवकुमार नेपालले राष्ट्रपति सीको भ्रमणले नेपालको अन्तर्राष्ट्रियय प्रतिष्ठा र महत्व बढाएको उल्लेख गर्दै यसबाट लाभ लिनुपर्नेमा जोड दिए ।
बैठकमा उपप्रमुखद्वय राम कार्की र विष्णु रिजालका साथै डा। युवराज संग्रौला, मिलन तुलाधर, डा. रुपक सापकोटा र मात्रिका पौड्यालले भ्रमणका विविध पाटा बारे आफ्नो धारणा र विश्लेषण प्रस्तुत गरेका थिए । राष्ट्रपति विद्यादेवी भण्डारीको निमन्त्रणामा चिनियाँ राष्ट्रपति सी चिनफिङले नेपालको दुई दिने राजकीय भ्रमण गरेका थिए ।
शनिवार नेपाल आएका शीले राष्ट्रपति भण्डारी, प्रधानमन्त्री केपी ओली, राष्ट्रिय सभाका अध्यक्ष गणेशप्रसाद तिमल्सिना, नेकपाका अध्यक्ष पुष्पकमल दाहाल, नेपाली कांग्रेसका सभापति शेरबहादुर देउवा, नेकपाका सचिवालय सदस्यहरुसँग भेटवार्ता गरेका थिए ।
सीको नेपाल भ्रमणका समयमा नेपाल र चीनबीच विभिन्न २० बुँदे सहमतिसमेत भएको थियो ।
