तेश्रो बागमती गोल्ड कप आजदेखि, गृहमन्त्री बादलले उद्घाटन गर्ने
हेटौंडा,३ फागुन,पूर्वी मकवानपुुरको बागमती गाउँपालिकामा हुने तेश्रो बागमती गोल्ड कप फुटबल प्रतियोगिता आजबाट सुरु हुने भएको छ । उद्घाटन खेलमा आयोजक फापरबारीले बागमती युवा क्लव सर्लाहीसँग प्रतिस्पर्धा गर्ने छ । त्यस्तै, दोस्रो खेल आईतबार फागुन ४ गते न्यू डाँफे युवा क्लव र नवजागृति युवा क्लव प्रतिस्पर्धा गर्नेछ ।
प्रतियोगिता बागमती गाउँपालिकाको वडा नंबर ८ स्थित जनता उच्च माविको खेलमैदान हुने बताईएको छ ।
प्रतियोगितामा १० टिमको सहभागिता रहने छ । प्रतियोगितामा ए डिभिजनका जावलाखेल युथ क्लब, संकटा युथ क्लब, हिमालयन शेर्पा, च्यासल युथ क्लब र साविक विजेता सरस्वती युवा क्लब खेल्ने संयोजक अरुण बलले जानकारी दिए । त्यस्तै मोफसलका मकवानपुर जिल्ला लिग विजेता न्यू डाँफे युवा क्लब, सिमराको नव जनजागृती, सर्लाहीको बागमती युवा क्लब, बीरगञ्ज यूनाइटेड र आयोजक टिमले प्रतिस्पर्धा गर्ने छन् । प्रतियोगिता फागुन १३ गतेसम्म चल्नेछ ।
बागमती खेलकुद विकास समितिको आयोजना र बागमती गाउँपालिका मकवानपुरकोे प्रायोजनमा प्रतियोगितामा हुन लागेको हो । गोल्डकपमा एकैसाथ प्याराफिट र खुल्ला स्थानमा बसेर ७ हजार दर्शकले खेल हेर्न सक्ने छन् ।
गोेल्डकपको विजेताले ६ लाख नगद, शिल्ड र मेडल पाउने छन् । उपविजेतले ३ लाख हात पार्नेछन् । सर्वोत्कृष्ट खेलाडीले ५० हजार नगद पाउने छन् । उत्कृष्ट गोलरक्षक, फरवार्ड, मिडफिल्डर, डिफेन्डर र प्रशिक्षकले जनही १० हजार प्राप्त गर्ने जनाइएको छ । प्रत्येक खेलका म्यान अफ दी म्याच हुने खेलाडीलाई ५ हजार नगद पाउनेछन् । प्रतियोगिताको उद्घाटन गृहमन्त्री रामबहादुर थापा (बादल) ले गर्ने बताईएको छ ।
पहिलो बागमती गोल्डकपको उपाधी हरिहरपुरगढीले हात पारेको थियो भने दोस्रो गोल्डकपको उपाधी सरस्वती युवा क्लबले हात पारेको थियो।
