खाडी र मलेसियामा सङ्क्रमित नेपालीको सङ्ख्या २९३ पुग्यो
बैशाख २०, काठमाडौं । कुवेतमा शुक्रबार थप ११ जना नेपाली श्रमिकमा कोरोना सङ्क्रमण देखिएको छ । कुवेतका लागि नेपाली राजदूत दुर्गाप्रसाद भण्डारीका अनुसार शुक्रबार थप ११ जनासँगै कुवेतमा सङ्क्रमित नेपालीको सङ्ख्या ७५ पुगेको छ ।
सङ्क्रमित सबैको कुवेत सरकारले आफ्ना नागरिक सरह नै उपचार गरिरहेको राजदूत भण्डारीले बताउनुभयो । यसअघि कुवेतमा कोरोना सङ्क्रमित नेपालीको सङ्ख्या ६४ थियो ।
अहिलेसम्म कुवेतमा जम्मा १६०२ जना निको भएका छन् । तर निको हुनेको राष्ट्रियता नखुलाएकाले सङ्क्रमित नेपाली निको भए नभएको बारे जानकारी नहुँने राजदूत भण्डारीले बताउनुभयो ।
खाडीका देशमा मध्ये त्यहाँ रहेका नेपाली दूतावासका अनुसार अहिलेसम्म सबैभन्दा धेरै सङ्क्रमित नेपालीको सङ्ख्या बहराइनमा छ । बिहीबारसम्ममा बहराइनमा १५७ जना नेपाली श्रमिकमा कोरोना सङ्क्रमण पुष्टि भएको छ ।
यस्तै यूएईमा १२, साउदीमा ३१, कुवेतमा ७५, कतारमा १५, मलेसियामा ३ जना गरी खाडीका देश र मलेसियामा जम्मा २९३ जनामा सङ्क्रमण देखिएको छ । जसमध्ये साउदीमा ६, यूएईमा दुई र मलेसियामा दुई गरी १० जना निको भएर काममा फर्किएका छन् । यूएईमा दुई जना नेपालीको कोरोना सङ्क्रमणका कारण ज्यान गएको छ ।
