के नेपाल भारतको चंगुलमा बस्नुपर्छ ? – नेकपा सांसद भुसाल
काठमाडौं । सत्तारुढ नेपाल कम्युनिस्ट पार्टी नेकपाका सांसद बेदुराम भुसालले के नेपाल भारतको चंगुलमा बस्नुपर्छ भन्दै प्रश्न गरेका छन् ।
राष्ट्रियसभाको मंगलबार बसेको बैठकमा नेकपा सांसद वेदुराम भुसालले अंगीकृत नागरिकतासम्बन्धी नयाँ व्यवस्थाले राजनीतिक दुर्घटना हुने प्रमुख विपक्षी नेपाली कांग्रेसको चेतावनीको प्रतिवाद गर्दै यो निर्णय नेपालले स्वतन्त्र रुपले गरेको बताए ।
उनले भने, ‘चीनसँगको हरेक बहसलाई नकारात्मक हेर्ने गरिएको छ । कोदारी राजमार्ग बन्दै गर्दा पनि यही कुरा उठाइएको थियो । नेपालमा नाकाबन्दी गर्दा पनि त्यही कुरा उठाइएको हो । आज पनि नेपाललाई त्यतैतिर लैजान खोजिएको हो ।’
नेता भुसालले भने, ‘के नेपाल सँधै भारतको चंगुलमा बस्नुपर्छ रु त्यसो होइन भने नेपालले स्वतन्त्र ढंगले निर्णय गर्दा भारतबाट टाढा भएको किन भनिन्छ ? किन चीनतिर ढल्कियो भनिन्छ ?’
यो कानुन बनाउँदा मुठभेड गर्नुपर्ने कुनै कारण नभएको नेकपा सांसद भुसालले बताए । ‘के भारतसँग जोडिएन रु भारतको छोटे भाइ भएन भनेर मुठभेड गराउन खोज्दै हुनुहुन्छ रु त्यसमा पनि नेपाली हुँ भन्नेहरु नै मुठभेड गराउँछौं, आगो लगाउँछौं भन्नुको कारण मैले बुझेको छैन,’ उनले भने ।
भारतमा पनि भारतीय नागरिकसँग बिहे गरेको ७ वर्षपछि मात्र नागरिकताका लागि आवेदन दिने व्यवस्था रहेको र अरु देशमा पनि त्यस्तै व्यवस्था रहेको भन्दै नेकपा सांसद भुसालले यसको विरोध गर्नुको कुनै तुक नभएको बताए ।
कांग्रेसले राजनीतिक अभिष्टका लागि मात्र नयाँ व्यवस्थाको विरोध गरेको उनको दाबी छ । आइतबारको बैठकमा कांग्रेस सांसद जितेन्द्रनारायण देवले नेपाली पुरुषसँग बिहे गर्ने विदेशी महिलालाई ७ वर्ष नेपालमा स्थायी बसोबास गरेपछि अंगीकृत नागरिकता दिने प्रस्तावको विरोध गरेका थिए । नेकपाले नेपाललाई चीनको झोलीमा लैजान खोजेको र यसले राजनीतिक दुर्घटना हुने उनको चेतावनी थियो ।
तर नेकपा सांसद भुसालले कांग्रेस सांसद देवको नाम नलिइकनै मंगलबारको बैठकमा उनको दाबीको खण्डन गरेका छन् ।
